Wëdanié roczëznowégò ZYMK-ù
24 strëmiannika 2001 rokù w Mùzeùm Kaszëbskò-Pòmòrsczi Pismienizë i Mùzyczi we Wejrowie bëło sã pierszé pòtaknié Zéńdzeniégò Młodëch Ùtwórców Kaszëbsczich. Spòtkelë sã tej Michôł Piéper, Róman Drzéżdżón, Grégòr J. Schramke, Pioter Cëskòwsczi, Sławòmir Fòrmella, Dariusz Król, Jiwòna Joc, Agnes Bradtke, Alicjô Szczëpta a nenczasny direktór Mùzeùm Bògùsłôw Bréza. Brzadã negò zéńdzeniô bëło wëdanié pierszégò zsziwkù pismiona "Zymk" z tekstama młodëch kaszëbsczich pisarzów. Taczi béł zôczątk dzejaniô tzw. Zymkòwców.
Òd te czas je ju minoné 20 lat. Wëdónëch bëło dzesãc zsziwków, w jaczich debiutowało skòpicą kaszëbsczich ùsôdzców, a òpùblikòwónëch bëło w rémanta dokazów. To prawie tuwò niejedné kaszëbsczé trimë òstałë òbjawioné swiatu. Fejrëjącë ną roczëznã chcemë rôczëc, wszëtczich dzysdnia piszącëch do wespółrobòtë kòl wëdaniô roczëznowégò zsziwkù "Zymkù". Dlôte prosyme o sélanié do naju rozmajitëch tekstów (niepùblikòwónëch) w kaszëbsczim jãzëkù np. krótczich òpòwiôdaniów, pòwiôstków, wiérztów, tekstów piesniów z nótama, kòmiksów. Zwëkã ZYMKù bëła wiedno robòta pro publico bono bez dëtkowégò wënagrodzeniô, temù bédëjemë dlô każdégò aùtora pò 5 egzemplôrów jubileùszowégò wëdaniô.
Dokazë mòże sélac na mailową kastkã do4@muzeum.wejherowo.pl do 31.01.2021. Wszelejaczé pitania mòże czerowac do kòòrdinatora wëdaniô Mateùsza Klebbë (tel. 791 932 332).
Z ùwôżanim a pisarsczim Bòże pòmagôj
direktór Mùzeùm
Tomôsz Fópka